【獨家．有片】《西遊2》口碑差　愛將李尚正認同：望星爺出番嚟

周星馳套賀歲片《西遊伏妖篇》口碑麻麻，但估唔到連星爺愛將李尚正都踩續篇不及上集好睇，更表示自己都冇入戲院欣賞：「我喺新年期間就……有興趣睇下第二啲！」看來星爺真要檢討下，不要再令粉絲失望。

李尚正拍過很多星爺的電影，在《西遊降魔篇》飾演沙僧、《美人魚》中演警察、《長江七號》演曹主任，在今集《西遊2》則聲演豬八戒，可以說是周星馳的長期戰友。不過《西遊伏妖篇》口碑差，就連李尚正都頂唔順，問他覺得套戲好唔好睇，他婉轉地答：「我覺得係可堪回味囉！不過我喺新年期間就……都有興趣睇下第二啲！」他又將兩集比較：「我鍾意第一集多啲！因為我有份拍；如果有大家熟悉嘅演員呢，除咗吳亦凡啦，我覺得會更加好，不過而家就……」猶疑一秒後繼續講：「都好嘅！」然後尷尬傻笑。

問到觀眾都希望星爺再演戲，李尚正都有同感：「其實好多人有當面同佢講，但係我諗好難，第一如果佢自己做，佢對個要求會高到一個地步係大家唔使收工，佢以前冇咁着緊，佢而家係在意覺得自己如果達唔到自己要求，佢直情係唔開心……全世界都唔知有乜分別，佢自己知咁就慘嘞！」他又為星爺補充：「站在佢立場究竟值唔值得嘥咁多精神時間，不如將功力擺喺監製、導演度更加有效。不過我衷心希望星爺自己出番嚟做。」他又建議星爺復出可考慮演大奸大惡，奸到出汁就最好。

電影口碑差，李尚正說相信星爺會檢討：「佢會考慮邊一方面出咗問題，佢下次會改，我深信。」希望星爺明白觀眾心意啦！