鄭中基不滿被要求改《無賴》歌詞　拒上TVB：由嗰時開始我就唔妥

鄭中基（Ronald）當年憑一首《無賴》唱到街知巷聞，不但勇奪多個樂壇獎項，更擊敗陳奕迅的《夕陽無限好》奪得《2005年十大勁歌金曲頒獎典禮》金曲金獎！不過近日Ronald拍片回顧過往的經典MV時，就大爆當年被TVB要求改《無賴》的歌詞，令他耿耿於懷，甚至拒絕再亮相TVB！

Ronald在片中講到TVB節目《勁歌金曲》當時規定要求有自己版本的MV：「多數我唔記得嗰啲都係以前《勁歌》拍㗎，TVB要自己Version嘅MV，所以好多時我哋就統一咗佢，無謂拍三四次。」但他就大爆原來《無賴》被要求改歌詞：「《無賴》有句歌詞TVB一定要我改咗先可以參加《勁歌金曲》，就係『曾話過要戒煙，但講了就算』，佢唔知點解唔畀我講戒煙，我就特登要入過錄音室錄過另外一句歌詞『要儲錢但講了就算』。」

對於自己的作品被要求改歌詞，只是為了上TVB節目，Ronald相隔十幾年後再提起此事仍大感不忿：「總之呢個喺我嗰陣時開始嬲TVB，而我嬲TVB之餘，我嬲返自己公司，點樣可以一個Artist嘅歌，為咗一個電視台你走去改兩隻歌詞，淨係for佢？但嗰陣時就算啦，就錄咗佢因為公司問題啦，就要做嗰件事，但由嗰時開始之後我就唔妥TVB到而家，到而家咁多年嚟你哋未見過我喺TVB出現過！等如你話Michael Jackson嚟，我唔鍾意你隻歌叫《Billie Jean》喎，你淨係可以唱《攞嚟賤》，咁人哋會唔會睬你呀？係咪先？」

雖然Ronald愈講愈嬲，但其實當年TVB版MV的部分歌詞作改動後，點擊率都好高，而亦有網民表示當時因電視台受規管，所以不能出現「煙」及「酒」的字眼。Ronald在2000年因在飛機上醉酒鬧事而令他的事業走下坡，他更多次因情緒暴躁事件而形象插水，後來他轉型成為喜劇演員，事業逐漸有起色，直至2005年憑一首《無賴》翻身，翌年再與梁漢文、方力申一起主持TVB綜藝節目《美女廚房》，收視高企，風頭一時無兩！而近年雖然Ronald未有再亮相TVB，但就有上ViuTV《Chill Club》宣傳新歌，亦有拍攝ViuTV劇集《暖男爸爸》，依然大受歡迎！