向海嵐由代言人「升呢」變老闆　孖王賢誌做一日店長勁吸師奶客

向海嵐（Anne）早前宣布成為保健產品品牌星級代言人，近日索性「反客為主」，決定入股投資該保健產品，正式由代言人「升呢」兼任老闆。日前她與另一位代言人王賢誌（Vinci）身體力行擔當一日店長，到九龍站寄賣店力Sell自家產品，相當貼地！

兩位星級店長當天放下藝人包袱，落手落腳執頭執尾，由搬貨、執貨到上架都親自完成！在空檔時間，Anne不忘拿起「貓紙」溫書，惡補產品資料及成份。當有客人查詢時，Vinci發揮「王牌司儀」口才，不費吹灰之力便成功Sell掂顧客！Sell客當然也難不到美貌與智慧並重的Anne，作為生招牌的她吸引不少師奶捧場客，更引來不少途人要求「集郵」，吸客力驚人。

事後他們接受訪問，Anne坦言體驗一日店長的過程緊張又驚險：「其實都有少少辛苦啦，因為自己好緊張，當有客人問嘢時要好熟悉產品資料，好驚自己會講錯，同時又好想做成單生意，唔多唔少都有啲壓力。」提到她由產品代言人榮升投資者，Anne表示：「我投入程度好高，代言時已經好了解清楚產品，自己同身邊朋友都覺得呢隻產品有效，加上依家大家對保健品需求大，覺得市場前景唔錯，所以值得我投資落去。」

至於司儀經驗豐富的Vinci自言有一定的說服力，售貨時絕不怯場：「我覺得自己係個幾好嘅售貨員，因為我講嘢本身都有說服力，加上我真係試食過產品，所以客人聽完都好有信心。今日都唔算辛苦，一生人都冇乜機會做店長，我記得唯一一次係為慈善賣二手衫。」原來Vinci讀書時曾在茶樓推點心，所以搬貨執貨對他來說也是Easy Job：「搬貨唔算好操勞啦，我細個讀書時，屋企人移民加拿大開過一間中式酒樓，我有兼職做過『Busboy』傳菜推點心，嗰時仲操勞，所以今日呢啲算係好輕鬆喇！」