胞弟吳梓楓進軍娛圈 吳若希承認管教嚴：惡過對住自己小朋友
撰文：吳子生
出版：更新：
吳若希（Jinny)與細佬吳梓楓（Carson)今日（2/10）現身將軍澳現視城出席《思家大戰》節目錄影。提到細佬Carson以17歲之齡進軍娛樂圈，Jinny表示：「其實我就覺得佢入咗行，最緊要學待人接物。不過佢就會經常問我佢有咩嘢改善，咁我都見佢好努力去學咬字同練大隻。」
身旁Carson表示：「其實家姐管教都好嚴，我係唔敢去偷懶。不過唔知點解操極都係咁瘦，可能自己跑開長跑嘅關係，所以食極都唔會肥，咁唯有靠家姐再睇緊我多啲。」Jinny接著說：「其實我對住佢係惡，仲惡過對住自己嘅小朋友。因為成日覺得佢冇倚靠，咁所以想佢快啲成熟啲，希望佢可以照顧到自己。」