愛女Abigail K1開校 獲老師讚乖 陳柏宇：佢好肯參與活動
撰文：吳子生
出版：更新：
陳柏宇（Jason) 今日（27/9）現身觀塘為香港開電視全新節目《世界零食開倉戰》錄影。談到囡囡Abigail K1開學，正式成為幼稚園新生，Jason表示：「佢第一日返學老師讚佢好乖，好肯參與活動。不過有我哋喺度，佢就會倚賴啲，但我哋唔喺佢身邊，佢就會識做自己嘅嘢。」
被問到囡囡返到屋企會否懂得執拾自己物品時，Jason笑言：「我係要同佢講，啲嘢用完要自己執返，如果唔係爸爸會揼晒佢。（試過揼過？）真係試過。因為齋講冇用嘅，佢知道後係喊晒出嚟，喊住猛叫爸爸唔好揼呀。不過佢呢段時間受訓，佢就會知道咩事，有實際行動，就會變得有阻嚇性。」