【小男人週記】周秀娜挑戰三大經典女主角　出必殺裸辭：望承接到

由鄭丹瑞(阿旦)、周秀娜主演的賀歲電影《小男人週記3之吾家有喜》，將在年廿九(26)正式上映，讓人相當期待。距離首齣電影《小男人週記》，已經有27個年頭，當時由電台廣播劇搬上大銀幕，而阿旦演活了梁寬的角色，成為小男人的經典代表，翌年開拍電影續集《小男人週記II錯在新宿》，其後無綫更開拍《摩登小男人》劇集。

在首齣《小男人週記》中，女主角雖然是飾演阿Ann的鄭裕玲，但觀眾焦點卻落在大美人鍾楚紅身上，在片中飾演林太，本來看同公司的下屬阿旦不順眼，卻因一次意外二人被困在雜物房，其後慢慢發展出似有還無的愛情。另一位飾演阿旦初戀情人的李美鳳，亦是出名的電眼美人，該片票房大收1,600萬。至續集《錯在新宿》，同樣有另一位靚女關之琳登場，票房亦收到9百多萬，成績確實相當出色。

面對幾位前輩，新一代寬女郎周秀娜，一樣無有怕，更使出她青春無敵的天賦本錢，越級挑戰幾位前輩。片中娜姐飾演阿旦秘書兼秘密情人，二人在午膳時到酒店短敘，而娜姐只穿着胸圍、內褲，跟男友在床上傾心事，跟着向阿旦遞上辭職信，惹火性感度爆燈，名副其實是「裸辭」。

娜姐回覆《香港01》記者短訊，表示「唔敢講係越級挑戰，因為之前兩部咁成功，同埋小男人週記個古仔不嬲都係好貼地，所有劇本都係好滿足到小男人嘅幻想。嗰時嘅生活同依家都唔同啦，已經過咗27年，梁寬都唔同咗啦。都係之前兩部大家咁鍾意，我先可以參與第三部，希望承接得到之前兩部咁好，大家都鍾意啦。」至於在片中「裸辭」一幕，娜姐表示：「自己唔係做OL嘅，冇試過辦公室嘅關係，依家都係純粹食字啫。有冇壓過前輩？有呀，我壓過嗰個係小男人旦哥，裸辭時確係壓住過佢。旦哥話好想重拾以前拍電影嘅情懷，我自己當然好想有佢嗰個年代嘅成績，票房嘅嘢真係好難估計。新年檔大家最緊要熱熱鬧鬧，睇得開心啦。」上兩齣《小男人週記》紅姑、之之均惜肉如金，娜姐卻是瞓身博盡，隨時殺出血路，在賀歲檔成為贏家。