麥明詩新年最怕親戚膠問題 十優港姐神回覆解圍
新年一到，未結婚的人最開心就是逗利市，但得到利市的代價，就是親戚登門拜年關心你。見你單身，問你「拍拖未？」，有另一半的話，就問「結婚未？買樓未？」社會大學一年級？就問你「搵到工未？」總之，不論你什麼身份、狀態，都一定有問題想問你，年年新年年年loop，大家又有心理準備，俾人關心未？
場地提供：西九龍中心飛龍冰上樂園
相信「貼地港姐」麥明詩都有一番感受，2015年當選港姐，去年正式加入娛樂圈，一開波拍了電視劇《賭城群英會》及電影《失戀日》，收獲都算唔錯啦。身邊親戚眼見麥明詩成為演員，新年都不例外問：「娛樂圈係咪有好多秘聞㗎？」麥明詩對於這條問題，一概都答：「我唔知呀，我都係睇報紙先知㗎咋！」真實回答，輕易KO親戚好奇心，唔知幾時，同親戚傾計都要食腦。所以，一於唔好俾佢停，繼續測試麥明詩一下面對親戚問問題，會點應對。
新年都要回一回帶，過往麥明詩放下港姐身分，開始拍電影、電視劇。早前率先見街的《失戀日》，麥明詩飾演神經質少女婷婷，就被網民指角色太「膠」，演技略帶浮誇。Louisa一向都見慣風雨，她坦言電影上映時已做定心理準備：「我唔睇嘅時候，朋友都會畀我睇。作為一個新人，自己睇返都覺得還可以，演戲其實好主觀，始終第一次拍戲，都想努力去做好，畀到導演睇我做到某啲特質，演技方面都想隨著經驗拿捏得更好。」導演葉念琛塑造有「膠」味的婷婷這個角色，有些地方源自於麥明詩，至於係邊方面？她說：「導演之前有留意過我的新聞，覺得我性格比較率直。」其實，現在很難找到率真的人了！
接著2017年，麥明詩繼續拍戲，現時正拍攝網劇《使徒行者2》，之後又拍重頭劇《跨世代》。TVB似乎待麥明詩不薄，到目前為止所拍的都是「大壇嘢」，Louisa就好謙虛：「套劇大，但我細嘛。」她頗享受現時這種狀態：「我好鍾意呢種階段，有充足時間休息之餘，都俾我有時間去為角色做research，去思考，咁先可以增長得多。如果唔經過思考去拍，拍得多都唔代表好。」
拍劇時間長，現時單身的麥明詩好似都冇乜時間拍拖，她說：「可以同步進行嘅！但我都唔係好急。」不過，大家都好心急喎，每次見到Louisa身邊有異性出現，就會特別幻想。就算不是真，都總會話麥明詩「收兵」，Louisa就講笑話：「如果大家替我心急嘅話，就快啲介紹下啦。要搞笑，心地好又上進嘅。」唔使介紹啦，直接去馬仲加分啦。