港姐2021丨自選泳衣睇盡佳麗品味　水底影相撞橋ViuTV《美選》

無綫的港姐真人騷前哨戰《We Miss Hong Kong STAY-cation晉級賽》今晚（16日）播出一集，終於正式落水，一班港姐換上泳衣行浮板拼成的T台，紅組及粉紅組順利拍攝，但一到綠組登場即大風大雨，師姐向海嵐都呻：「係咪又想我哋包尾！」玩水過後，節目再次突擊，要求港姐們在30分鐘內換好衫學catwalk。今集師姐歐陽妙芝登場，她形容師妹出場似衝鋒、未穩定到重心，又教用棍及披肩改善步姿，只得朱綽盈完美示範。

晚上另一環節要港姐們潛水擺甫士，有人因為不諳水性而嚇到喊，粉紅組7個人當中更有5人怕水，被迫頂硬上潛水。巧合的是，5年前ViuTV 節目《美選D.n.A》亦用過此招，當時要女生們穿晚裝落水，主持Eric Kwok及火火都有落水影埋一份。