Asha徐㴓喬為「拆散」田牧情侶認錯：係梓芊衰！

ViuTV人氣劇集《大叔的愛》今個星期進入結局篇。昨晚（13日）播出最新一集，主角「阿牧」有見男朋友「田田」與青梅竹馬的「梓芊」有曖昧互動，憤而與「田田」分手，崩潰爆喊惹得一眾粉絲大呼心痛。

Asha（徐㴓喬）今日（14日）與同劇演員、MIRROR成員 Stanley（邱士縉）出席劇集宣傳活動，Asha笑言「梓芊」向「田田」表白並無惡意，「佢會諗如果屈住唔講，80歲都會後悔冇講到。」

問會否擔心觀眾怪罪她拆散「田牧」情侶，她坦言：「怪緊啦已經！」又笑指理解觀眾將阿牧爆喊矛頭指向「田田」和「梓芊」，「但我明嘅，因為觀眾太入戲，覺得點解梓芊會咁自私嘅！證明觀眾睇得好清楚，所以我係好開心嘅！即使大家都怪落梓芊度，我知嘅，係梓芊衰，知道！」