安德尊薛家燕拍飲食節目　大王唔怕同鼎爺比較

大王安德尊、薛家燕、裕美、翟威廉、張美妮今日於銅鑼灣為無綫節目《區區添食團年飯》進行拍攝。今次大王身旁不再是李錦聯而是換上家燕姐，鬥嘴當然唔少得。大王則指家燕姐經常有彈無讚，「佢好多嘢講，成日對我地有意見。但其實家燕姐已經食盡天下，有好嘢食一定要請教對方。」而他亦有留意最近掀起話題的《鼎爺廚房》，並指自己好佩服鼎爺的廚藝！

自言好鍾意食嘢的家燕姐表示拍節目要一日食六餐，就話唔過癮，皆因「我地唔可以食得太飽，所以每次都食一口啖，其餘就俾工作人員幫手。」到就快到農曆新年，家燕姐透露原本年初一要到內地接騷，但後來就取消了，點解呢？原來係家燕姐家中的仔女邀請媽咪一齊去旅行，「佢地同我講，媽咪不如我地新年一齊去旅行啦。我地考慮三亞，台灣或者越南，睇下邊度可以訂到機票。」

而今次擔任嘉賓的裕美就透露即將推出新書《裕美一個人的精彩》，講明係一個人嘅精彩，當然是講裕美去年六月離婚後的心路歷程，「我本身係一個依賴性好強的人，做什麼都要有人陪。但離婚後我開始嘗試一個人行山，發覺一個人行動會更瞭解自己的內心。」講到現時的感情狀況，裕美就抱隨緣態度，「都有追求者，但我想宜家嘗試下一個人生活先，我都想快點可以生小朋友，唔想拍散拖。」