【勁歌金曲】許廷鏗漏多謝吳業坤忙道歉　譚嘉儀：今次唔會講錯台

在《2016年度勁歌金曲頒獎典禮》上，好多人都不約而同講起頒獎禮的舞台，正正一班歌手6、7年前的起步點，當中包括「巨星幫」的許廷鏗（Alfred）、譚嘉儀、胡鴻鈞等。

相隔七年，Alfred在這個台上捧走3個獎項，其中一個更是大獎「最佳演繹男歌星」，而得獎後的表演「演繹」更是令人眼前一亮，又高台又噴火，整個表演長達6分幾鐘，幾乎可以媲美演唱會級數，連網民都話：「似睇緊許廷鏗的個人演唱會！」

其實今次的表演真的是準備充足，Alfred在訪問時表示計劃時預定在6分鐘內，最後有6分幾鐘，是因為發覺氣氛實在太好，所以照原定計劃，第一次在表演中「玩火」，Alfred笑言驚驚地：「我睇唔到個火係點，我Feel到佢好熱囉，後面好似突然間十級大火咁樣，最緊要大家冇事，我本身有啲怕，安全為上啦，頭先都好好。」

談到多謝「巨星幫」時說漏了吳業坤，Alfred即說：「吓？係呀？我多謝漏咗坤哥呀？係呀係呀，對唔住呀！」Alfred更表示原本準備時是有坤哥的，但最後還是說漏了：「我成日覺得漏咗啲嘢，當時我窒咗一窒㗎，現在多謝返坤哥啦，其實漏咗好多巨聲，仲有Jay Fung（馮允謙）啊，不能盡錄，但我盡了能力去唱同講。」

另一位之前在《十大中文金曲頒獎音樂會》有甩漏的嘉儀當晚同樣奪得「最受歡迎新人獎」（金獎），因為之前多謝錯頒獎機構，在勁歌上亦被司儀崔建邦取笑：「記唔記得敝台？」嘉儀隨即乖乖話多謝無綫。

訪問時，嘉儀亦講起上次因為太緊張，所以覺得不好意思：「今次好搞笑，崔建邦同農夫都話我講嘢一舊舊，係好搞笑，今次一定唔會再錯，都好多謝森美出post叫我唔使擔心，其實係自己大頭蝦。」