袁詠儀張智霖十指緊扣遊普陀山　14歲魔童眉眼似足媽咪顏值高

袁詠儀（靚靚）與張智霖（Chilam）是圈中的模範夫妻，兩人結婚20年依然非常恩愛，囝囝張慕童（魔童）更完美集合父母的優點於一身，一家三口非常幸福。靚靚同Chilam由2012年開始每年都會到普陀山祈福，今日（1日）她就在微博Post出幾張普陀山之旅的照片，並寫道：「祝願風調雨順，國泰民安。2021普陀山之旅圓滿完成！」

相中所見靚靚一家三口都穿上白色T恤，雖然魔童戴住口罩，但眉眼與媽咪靚靚十分相似，一家人顏值相當高！而從背影照所見，14歲的魔童已經高過媽咪，更拍得住爸爸，夾在中間的靚靚一手拖實老公Chilam，而另一邊就被魔童搭住膊頭，畫面十分溫馨，不少粉絲都留言表示好羡慕靚靚：「一家人太甜了吧」、「兩邊都是帥哥，簡直人生贏家」、「張式牽手永遠不變」、「全世界最幸福的靚靚姐」、「魔童又高又帥」！