馬國明《賭城群英會》又變倉底　天然呆堅勞氣：只係想搵多啲錢！

以天然呆聞名的馬國明，終於有反應啦，不過就係嬲嬲豬！事緣無綫劇《乘勝狙擊》在本月16日播出，而且演員陣容相當強勁，有出爐視帝陳展鵬、鷲哥吳岱融、林夏薇、陳山聰、單立文等，令人萬分期待。咁關馬國明乜事，他又無份演出該劇，咪就係因為無份演出囉，其實劇中陳山聰演出的大反派，原本是馬國明飾演，但當時馬國明被安排拍攝《賭城群英會》，兩劇又撞晒期，馬國明都無計。

《乘勝狙擊》中大反派伍柏義，是一名魔術高手，於賭枱上戰無不勝，原本是陳展鵬的好友，但其後性情大變，殺死愛人，炸死同伴，跟展鵬反目成仇，惡鬥連場，角色深具可塑性，以近年無綫逢奸必紅的定律，劇集播出後，陳山聰肯定成為話題，馬國明卻被迫將機會白白讓給山聰。馬國明接受《香港01》記者訪問，以往充滿暖男味道的他，提到《乘》劇反派角色被截糊，語調即變得十分勞氣，「我《賭城》個角色都好好，好有發揮。」

難怪馬國明心火盛，王晶監製的《賭城群英會》帶有《千王之王》的影子，而且有四哥謝賢、劉兆銘等當年人腳，而馬國明飾演的ok仔，為練好賭術報仇，遂拜四哥為師，跟佘詩曼又有感情線，論牌面肯定不會輸蝕俾《乘勝狙擊》，但無綫力捧出爐視帝陳展鵬，率先播他擔正的劇集，由於兩劇同是以賭為題材，馬國明再次成為犧牲品。

馬國明表示：「幾時播十幾年嚟都係公司安排㗎啦。」《賭城群英會》播映遙遙無期，隨時跟《流氓皇帝》一樣成為倉底劇，幾年後才拎出來攝期，對於劇集再一次被hold起，究竟何時才能播映，馬國明無奈又氣頂，「咁你要問番TVB啦！」

馬國明近年擔正的劇集如《鐵馬尋橋》、《宦海奇官》及《女拳》，均是放在炮灰檔播出，令他在台慶頒獎禮連續多年坐冷板櫈，對於視帝寶座，馬國明早已不存厚望，反而密食當三番，專心拍劇、登台掘金，早前才斥資近2千萬購入太古城頂層連天台單位，不用贏視帝一樣可以成功上車，相當勵志。踏入2017年，馬國明除了《賭城群英會》，還有《心理追兇 Mind Hunter》、《降魔的》及未開拍的《深宮計》，四劇在手，頒獎禮籌碼十足，但試過多年失望的經驗，馬國明對獎項似乎無晒反應，「依家只係想搵多啲錢，我好簡單㗎咋！」無綫又令一位充滿熱誠的演員心淡，究竟是誰之過？