【叱咤】吳業坤呆住拎「我最喜愛男歌手」　跟Eason合照才是大獎

「偽毒坤哥」吳業坤昨晚於《叱咤頒獎禮》繼去年後再度奪得「我最喜愛男歌手」，於五個候選人中絕對是黑馬，難怪坤哥得獎一刻完全呆掉了，雖然今年眼鏡沒有霧氣，但感言仍是講到口窒窒，去到慶功典禮上，坤哥影大合照時又自動企到最後一行，難道自覺奪獎當之有愧？

訪問時，坤哥直言只要有份參與，企什麼位置沒有所謂，又講到奪獎一刻完全反應不過來：「根本反應唔到，上台冇講過嘢就已經走咗喇，冇諗過要講咩，因為完全冇預過，本身要講的我在拎歌曲獎時講晒，所以真係好對唔住。」自嘲「好樣衰」的坤哥又講到沒想過冧莊，是因為今年自己聲勢一般。「其實個聲勢係大家都睇我唔到，但可能好多人都默默支持，多謝大家！」

談到坤哥心目中的最喜愛男歌是誰？作為陳奕迅（Eason）的小粉絲，坤哥即時回答要揀Eason：「因為係我偶像，今日都好開心，想搵佢影相，但出到去又唔好意思，對上一次兩年前佢開演唱會，同佢影相已經好樣衰，佢傾緊偈我插入去。」結果坤哥今年也如願和偶像在完騷後合照。