吳若希離家出走約星夢幫開P　嬲豬大肚婆搵David陪瞓？

自吳若希（Jinny）宣布停工一年養胎做媽媽，所有事都以BB為先，日前更被發現在私人Facebook呻男朋友Alex作病又唔食藥睇醫生，要離家出走去「保護兒童協會」。Jinny有冇去到保護兒童協會冇人知，不過一句「你搵到我我話你叻！」我係Alex見到真係心都離一離，始終近日天氣轉凍，一個大肚婆去得邊到？原來係去了買7000蚊退燒用品給未來老公醫病。

事隔一日，Jinny再去和星夢旗下的一班歌手朋友開Party，而且開完party之後，大肚婆已經返咗屋企喇！不過Jinny似乎未下啖氣，事關Jinny影了一張睡床的相放上Instagram，上面瞓咗愛犬Honey同埋David……留意返，David並不是奸夫，而是Jinny離家出走時留給Alex的朋友──一隻仿製強勁臂彎的藍色攬枕。

Jinny更寫到：「一張床，明明得兩個人訓，但係要三個枕頭，你明唔明點解？依家仲要多個David。」啫係Jinny、Alex & David，然而，男友的留言又有另一說法：「你尋晚先話張床好大～一個枕頭honey，一個枕頭你，一個枕頭係David，無枕頭果（嗰）個係我」咁…當眾耍花槍法…算啦，相嗌唔好口，你哋都係換張大啲嘅床，預埋神犬Honey同吳係喵嘅位啦。