【高清多圖】女神信緣分？簡淑兒鼓起勇氣表白：緣分唔係坐喺到等

TVB處境劇《愛．回家之八時入席》臨近尾聲，開始逐一交代劇情和感情線，而昨日趁着Boxing Day就有其中一對深得觀眾喜愛的小情侶在一起，由少女標本的簡淑兒（Jessica）飾演的袁冰冰（Elsa）終於與阿齊（阮政峰飾演）有情人終成眷屬喇！

雖然有不少網民都好希望Elsa可以和一直暗戀的十仔（馬貫東飾演）拍拖，不過女主角Jessica卻這樣想：「好多人想我同十仔一齊，但Elsa同十仔已經冇咗㗎啦嘛，大家就係所謂嘅有緣無分，有緣識到，但十仔對Elsa冇意思㗎嘛，但Elsa同阿齊就係有緣有分，有緣識到都識得去把握個機會。」

講起緣分兩個字，Jessica昨日在劇集出街前亦都在Facebook貼上劇照寫到：「曾經有人同我講過『緣份（分）』呢兩個字嘅意思…佢話，『緣』係上天比兩個人一個相識嘅機會『份（分）』係呢兩個人點去把握個機會...牽手定放手...就睇大家嘅『緣份（分）』。」

看來，女神應該很看重緣分？Jessica直言：「細個會覺得感情係天註定，覺得所有嘢唔需要自己爭取，大個咗就會知其實感情上有好多嘢。」她表示是否能夠有緣有分，就是看大家有幾願意為感情付出，好似Elsa和阿齊，若果Elsa沒有決定送銀包，而阿齊又沒有送首歌，就沒機會在一起：「好多人會覺得緣分係天註定，但其實天只會幫到你一半，唔會幫得晒你㗎嘛。」

問到Jessica可會爭取屬於自己的緣分？她就想起曾經遇到一個男生，因為大家住的國家不同，所以好猶疑要不要和他告白：「喺佢要返番自己原本住嘅地方時，我覺得好唔捨得，就發覺鍾意咗佢，我好猶疑好冇同佢講，因為個男仔冇追我，係對我好好嘅，但我完全唔知佢係咪鐘意我。」

Jessica續說，當時想起Facebook上打的那句說話，知道坐着是不會等到緣分，所以就在對方臨走前表白：「好彩佢都答返我同一樣嘅嘢，佢都鍾意我，然後就一齊咗，如果個刻我冇講，佢返番去自己國家，大家都唔會一齊囉。」雖然這是Jessica第一次鼓起勇氣向男生表白，可惜因為維繫異地戀甚艱難，最終拍了大半年拖就分手了。

聽完女神講「緣分論」，有沒有鼓勵到你追求心愛的對象呢？祝願大家下年聖誕都可以同你的最愛過啦！♥