MIRROR紅館開演唱會? 花姐:我哋仲要開會傾下先

撰文:陳芷穎
出版:更新:

人氣男團MIRROR一連六場的演唱會今日(11/5)來到尾聲,12子完騷後立即出席慶功宴。相信「鏡粉」最關心的一定是MIRROR何時在紅館開騷,有傳MIRROR會接手跨年檔期,花姐接受訪問時指要再開會談論詳情:「大家心入面好想做紅館,嗰個係咪最適合嘅時間,我哋仲要開會傾下先。呢幾日工作太緊密,瞓都冇得瞓,所以畀我唞下先。」
最近有消息指姜濤將與毛舜筠合作拍戲,花姐坦言計劃中:「我哋有Plan姜濤處女作今年發生,有Plan嘅,但個詳情要再傾,劇本啱唔啱都要大家傾。(未落實同彭導演合作?)成日同彭導演傾呢啲,佢係拍嘢好細膩嘅女導演,係咪真係合作就要再傾,唔可以咁倉猝,因為都係佢第一次。」