周柏豪登央視唱《我和我的祖國》　曾涉政治風波失工作

周柏豪曾喺社交網絡呼籲大家登記做選民，結果引來內地網民極度不滿捲入政治風波，好多工作受到牽連。五月四日中央電視台發布影片，邀請大灣區各城市代表合唱《我和我的祖國》慶祝五四運動102周年，周柏豪都係其中一員。

6分幾鐘影片中，譚詠麟、陳啟泰、黃百鳴、劉德華等藝人都有現身，而全國政協委員霍啟剛帶領獻唱，周柏豪及菊梓喬都有份合唱。其實去年5月佢地都有參與，由全國政協副主席董建華、梁振英牽頭成立嘅「香港再出發大聯盟」活動，合唱主題曲《再出發》，今次仲登上央視，外界認為象徵周柏豪正式解禁。