雙生陌生人｜「翻版林夏薇」彭翔翎再演智障角色：唔驚被定型

有「翻版林夏薇」之稱的彭翔翎（Janice）憑《踩過界II》的單元中，飾演一名被害殺死的輕度智障少女程可欣，演技備受讚賞成功入屋。今日（3/5）Janice出席無綫新劇《雙生陌生人》拜神儀式時，接受《香港01》訪問透露，在新劇中飾演再演智障少女：「其實演呢個角色真係難過上次嗰個角色，因為我哋拍劇始終都會有對白，係好難去揣摩真正患有自閉症嘅人講嘢嘅神態。咁所以我特別搵咗兩位患有自閉症嘅家庭人士接觸，幫助我加深了解佢哋日常動態會係點。（再演智障人士，怕唔怕被定型？）唔驚被定型，反而覺得好有挑戰性。」

Janice續指：「講真到現時為止，我仲未搵到最好嘅演繹方法。拍咗5場戲，連導演都話我做得唔好，於是我就走去揾監製希望佢哋指教我邊方面做得唔好。監製就同我講，其實個角色好簡單，只係輕度自閉，叫我做返正常人一樣就得，放膽啲放輕啲就得，其實而家我都仲擔心緊。」