崔建邦37歲再打擂台搵自信 曾遭無綫解約：諗過唔再踏足呢一行
過往大家對37歲崔建邦（Amigo）的印象，都是做開節目主持，口才了得；但他在明年一月不再「企定定」，而去參加大型的業餘拳賽，早前更特意到菲律賓進行職業運動員模式的訓練。經過一番操練之後，體重由高峰期的160多磅，極速減了20多磅。如此認真對待，皆因他形容：「今次係一個奇妙嘅旅程，幫我可以達成我覺得失去咗嘅自己。」
攝影：符祥定
場地：FFG武術健身中心
崔建邦之所以會接觸拳擊，全因為當初不想遭人欺負的心態，「18歲嗰時喺機鋪俾一班比我年長嘅人欺負，憤而有個反撃嘅念頭，就同自己其中一個長大嘅朋友諗方法，機緣巧合之下就學咗西洋拳，發覺都幾啱我。」Aimigo笑言「報仇變咗報名」，因此都有打過多場業餘拳賽，到後來因為經濟收入的問題，所以就把興趣放一邊。
話就話參加業餘拳賽，對手的體重跟自己相同，打起上來沒那麼吃力，但崔建邦因為這一個「遲來的機會」，都有好大壓力：「每晚瞓覺都會回想起對打嘅畫面，之後就失眠。」同樣地，崔建邦都講到自己就快都變「四章嘢」，今次打拳訓練，簡直是「修身齊家治國平天下」他所說的是Keep fit：「真係唔知自己肥到一個地步係咁嚴重，加上以前後生做體能，身體就好快恢復，而家年紀大咗，做完體能完全唔想起身，又周身痠痛。」雖然辛苦，但崔建邦希望可以最佳狀態示人，打得之餘，還變得更健康。
透過拳擊洗滌心靈
過去的崔建邦，是個新聞人物，曾經因形象負面，與TVB解約。後來再有一次機會，還是未盡人意，他坦言想過逃避，甚至放棄，「有諗過唔再去踏足呢一個行，好想去逃避，但後來發覺，人生得一次機會，所以我都唔會輕易放棄自己。」如今放下事業參加拳賽，迎接挑戰，這又是否同時為事業帶來一個唞氣位？「今次可以話係洗滌心靈之旅，呢幾年有高高低低，走過好多路，有好多唔同嘅諗法同顧慮，甚至係奇怪嘅念頭。而今次呢段時間，唔理其他嘢，剩係諗比賽，搵返唔見咗自己嘅地方。」
不介意別人目光
不過，崔建邦參加拳賽，難免有人對他過去：曾涉嫌襲撃前女友鄺敏慧有所聯想，但他不諱言地說：「如果介意嘅話，就唔會上擂台。過去就成過去，我都唔想去回顧，過去都係我嘅歷程，經過好多年，今次打拳係對我自己嘅挑戰。」同時，他今次積極參加拳賽，也不是為了洗底：「我無介意觀眾睇法好耐，最重要係自己點睇自己，如果為人哋點睇去參加（拳賽），成件事就會本末倒置，我係想透過呢件事，話畀自己知我無放棄過。」其實，曾經處於低谷崔建邦，決心在40歲前參加拳賽，重拾年少熱誠，其中一個原因，就是聽過張敬軒的一席話：「佢同我講，人生就好似遊樂場，得一次機會，點解剩係玩旋轉木馬，而唔玩過山車？難得有次可以係遊戲入面，就應該玩所有遊戲，用心去玩，所以今次就玩過山車（參加拳賽）。」
未Ready結婚
崔建邦終於達成夢想，踩上擂台，但他卻表示有好多事仲未完成，尤其是成家立室。他正與林珊珊女兒李怡拍拖，咁應該都係時候啦？但他卻說：「短期內都未有呢個諗法住，每個人對成家立室嘅概念同要求都唔同，我自己就係想成熟啲、穩健啲，我自己Ready好對象，但未Ready好去結婚。除咗咁，家人嘅生活都好重要，我都想佢哋可以再好啲。」