【台慶頒獎禮】馬國明繼續陪跑 講視帝好葡萄：喜劇都唔係攞獎戲
撰文：何志衡
出版：更新：
無綫《幕後玩家》玩完，接住播放的《流氓皇帝》終於讓觀眾心情輕鬆一下，之但係男主角馬國明就未必咁輕鬆，事關過幾日（18日）便是台慶頒獎禮大日子，馬國明只憑《為食神探》便同廖啟智、黃宗澤、黎耀祥等爭視帝，唔通今年又陪跑？
馬國明今日為宣傳《流氓皇帝》出席花車巡遊，由中環遊到西環，他全程保持微笑卻沒有表現得很興奮，而途人要求合照他都有求必應。問他有沒有信心贏視帝，他毫不考慮便回答：「冇，我好隨緣，其實呢兩年我都好隨緣，首先上年《梟雄》我係客串，今年我啲劇都唔係啲攞獎嘅戲，係大家笑完就算嘅戲。大家心照，有啲戲好似賀歲片咁，笑完攞個氣氛，唔會攞獎囉！所以今年當開party囉！」
正所謂「一理通馬國明」，講到尾公司叫你拍什麼就拍什麼，無得say no！他愈講愈明，愈講愈酸溜溜：「可能公司想訓練我拍喜劇啦！其實我對演喜劇冇乜信心，但作為一個演員又應該咩都磨練下，唔可以話避咗唔拍，同埋難得仲喺TVB，TVB係好好嘅學校，無論你套劇收視幾差幾多人鬧你都好，你都仲有機會拍戲，但到你將來出咗去就唔同喇！你一兩套死咗就真係拜拜。」他繼續講：「你諗下拍喜劇有幾可攞男主角（獎），周星馳有冇攞過男主角獎？將來有機會出去嘅話咩都要得，唔通到時先話唔識拍喜劇咩。」馬國明前後講了兩次將來離開TVB，愈講愈心酸。唔使擔心喎，周星馳《少林足球》其實攞過金像獎影帝，不過都係離開電視台之後嘅事！