30歲TVB小花胡美貽早前被爆戀上百億富三代男友，林建岳與謝玲玲的兒子林孝賢，成為了討論話題。不過，作為半隻腳踏入豪門的她，對感情事就十分低調。日前（02/3）她出席籃球活動，面對追問感情事時也沒有講及太多。

胡美貽表示，早前工作了數個月，之後因病而需要休息整整一個月。「嚟緊拍節目《瞬間直擊半小時》，因為做得好，所以有得繼續拍。都仲有啲劇拍， mark咗兩三套。未落實，真係要開機拍咗先知。都未必係嘅，要播埋先計嘅，哈哈。」

問到感情事，她點答：「係呀，不嬲都唔講呢啲。自己嘅嘢就冇所謂，因為我覺得，我講畀你聽就預咗全部人都知，開心嘢咪分享。（幾時有開心嘢分享？）如果陣間打波贏波咪係開心嘢囉。（感情上嘅開心嘢呢？有冇計劃？）咁我又冇打算。我係嗰啲隨遇而安嘅人，會來就會嚟。（都想嘅？）冇呀，我反而覺得人哋想多過我，除咗我之外，所有人都好想。（『佢』比較想？）我啲屋企人同埋朋友都會比較想我有好結果。（另一半想結婚？）你知唔知呢個年代唔興結婚，而家好興單身經濟，唔係唔想，而係冇乜所謂。」