【美選D.n.A.】張沛樂壓力大瞓唔好　鄧月平講嘢差驚口窒窒

ViuTV舉辦的《美選D.n.A.》下星期將會進入決賽，而評判兼主持的方力申(小方)、火火、郭偉亮聯同丁子高、劉美君及八位佳麗今日在銅鑼灣舉行記者會。小方表示決賽時各佳麗會有才藝表演，「她們會表演返自己的弱項，都不斷地練習緊，而到時決賽會係直播，她們的壓力都好大。（咁你呢？）我負責背稿咋。」

兩位大熱張沛樂（沙律）及鄧月平（Larine）都表示準備決賽都好大壓力。沙律話：「我心情都好沉重，晚晚都瞓得唔好，係有種心力交瘁嘅感覺，不過好多謝評判將我由死亡邊緣咁拉返來，揀我入八強。」沙律到時會表演曾經失手的魔術，「如果有得揀，我都想唱歌跳舞，但評判想我喺邊度跌到就邊度企返起身，要係一個月內練好，我自己都好驚。」講到萬一失手，沙律就話：「都只好怪自己囉...」

至於戰鬥力驚人的鄧月平就話到時會表演演講，「工作人員覺得我係咁多佳麗入面講嘢講得最差，成日飛咗上太空，又笨笨哋咁，所以想我克服下。（咁驚唔驚到時口窒？）都驚㗎，始終要講內心嘢，要放低好多嘢。」選美未完，鄧月平就已經有戲拍，又會唔會覺得萬一輸咗選美，都不會影響心情，皆因有大把機會？她說：「我參加選美，都無諗過可以stay到最後，而家入到八強，點都想爭到個冠軍返來。」