前TVB藝員陳積榮肺癌擴散急籌醫藥費　駱振偉IG貼舊相撐大學室友

現年38歲的前TVB藝員陳積榮（Jeff）去年8月宣布患上第四期肺癌，並表示最壞情況可能只剩下半年生命而引起外界關注。Jeff當時獲好心人籌得80萬醫療費救急，然而經過這段時間的電療、標靶藥及免疫治療後，雖然一度情況好轉，本身約5cm大的腫瘤亦已縮細了三分之一，但他的經費已經差不多用光兼難以再繼續負擔龐大的醫療開支而不敢再去醫院，他的多年好友孫慧雪於上星期在Instagram出post幫Jeff籌錢，不少他的圈中好友紛紛伸出緩手，呼籲外界捐錢救助他過回正常生活。

Jeff今日（7日）拍片交代自己的病情，並透露近排身體狀態大跌：「12月尾左右，我就個膊頭開始有啲痛，除咗本身個肺之外，呢個位置（右）右邊肩膀都有，令到隻手開始唔係好郁到，隻手舉到舉唔起，行到開始攰，嗰個痛楚係，係好痛呀，膊頭係肯定擴散咗。」他表示連做氣功等運動都要因此暫停，之後醫生照到右邊肩胛位有癌細胞，1月尾完成化療後雖然活動能力有好轉，但仍然比之前差。他又透露最近摸到右邊膊頭近淋巴位置腫起，大小有如有一粒乒乓波，打算按中醫師建議先按一下，如果是淋巴發炎就會縮細，但如果沒有就要馬上自費去抽組織驗。

癌細胞有擴散跡象的同時，Jeff坦言位於肺部的癌腫瘤亦比之前擴大到7至8cm，醫生亦建議他轉食第三代標靶藥，不過要經過檢查證實他食第一代標靶藥物幫助，才能獲政府資助第三代標靶藥，現時他已經獲政府安排今個月尾做檢查。

Jeff表示由於上個月突然咳嗽咳到出血兼內臟抽搐，於是決定先自己支付每個月4萬元的第三代標靶藥費用，轉藥兩個星期已經明顯有好轉，不過副作用卻非常大好卻有腸胃肚瀉的副作用，現在連行路都覺得乏力。不過他表示自己之前都是靠朋友捐錢幫忙，近半年看中西醫、藥費及補充品等等已差不多用光所籌得的經費，如今要再服用比第一代標靶藥更昂貴的藥支付龐大的醫療開支，令他很徬徨：「我都唔想用咁多錢，唔想使咁多錢，因為我都係抱住一個我要好返、好想好返、一定會好返嘅感覺。」

感觸表示去年知道自己患病時並沒有太大感覺「唔識死」，但隨着時間的流逝，身子變得愈來愈虛弱就更加驚，一度講到哽咽：「嗰啲病痛打到嚟，個種痛係真係唔係講笑，冇得話你認叻或者...或者...我冇嘢我冇嘢我冇嘢就冇嘢，真係痛就係痛。12月前我都好似一個正常人，到1月真係感覺到自己似一個病人，好簡單一個動作我都做唔到，喺屋企我彈結他彈琴基本上都做唔到，情緒上一月到三月係好差，成日會夜晚無端端喊，我有時唔知自己喊乜，成日有人同我講話我未放低、未諗通某啲嘢，吓？其實我自己都唔知㗎，有時候痛楚或唔開心，或受病困擾嘅感覺，會令情緒好唔健康。」

除此之外，Jeff亦透露自己的心理變化很大，發病初期當時比較積極，亦對理想好有抱負：「之前我都話希望好返之後，我去拍戲、我有咩理想要做啲咩，但到而家呢一刻我都想，但如果你畀我揀嘅話，一定係健康行先，生存係最重要，我連手都提唔起，點樣去拍戲？」他坦言希望自己可以像正常人一樣，回復七成活動能力，並承諾一定會咬着牙關度過難關：「我其實一路以來都好痛，嗰種痛楚係唔知邊度嚟㗎，亦都唔知點樣解決，我只想講我一定會捱得過，雖然係痛係辛苦，但我知道好多人都好愛我好支持我，所以我要頂住，我會好返！」

見到Jeff的情況嚴峻，與他同為第20期藝員訓練班的孫慧雪帶頭為他籌款，翌日馬浚偉在網上開Live演出為他籌醫藥費、Jeff的訓練班同學鄧永健都有在Instagram出post為他打氣。與Jeff是大學同學的ViuTV藝人駱振偉今日（7日）亦有在Instagram呼籲各界申出援手幫幫他：「我嘅老友為佢嘅生命好努力打緊仗，要視乎龐大醫療嘅費用真係好唔簡單，希望大家都可以幫下手！」

點擊觀看為Jeff籌款打氣的藝人：

他亦分享了自己與Jeff的濃厚兄弟情：「我地（哋）一齊住hall（宿舍），我人生第一個roommate（室友），一齊打winning（遊戲），一齊上莊。你咁叻，撐住呀！我地（哋）一齊打依（呢）個仗呀，你係我見過最tough（堅強）嘅男子漢！」

Jeff之前在TVB曾拍劇2、3年，而且大多都是演閒角，之後他過檔去HKTV，在《惡毒老人同盟》中飾演李楓的敗家仔而留下深刻演出。他之後再內地拍網絡電影，又自資拍三部近乎「零成本」電影，包括《戀愛36D》、《最囧麻花》和《荒島屍變》，並於去年中籌備一部自編、自導、自演的電影《訓練班》。