【野外步出】鄺潔楹曾戀上黑人　祟拜對方技能：佢流住Rapper嘅血

鄺潔楹早前應方紹聰邀請，擔任節目《野外步出》嘉賓，節目中攀山涉水兼首度玩滑翔傘，Judy外形嬌滴滴但原來膽生毛，體重過輕一打開滑翔傘唔使助跑已經飛上天都無有怕，佢仲喺節目中大方分享往日情史，原來佢高中時有個男友係黑人﹗

正在蜜運中嘅Judy分享09年遠赴美國求學，喺西雅圖大學畢業後回流香港發展。喺美國讀高中時曾戀上一位黑人Rapper：「我唔同時期鍾意嘅嘢都唔同，記得高中時身邊好多黑人同學，就鍾意咗識Rap嘅人，當時嘅對象喺Rap方面非常有天分，方紹聰聽到我呢段往事好有興趣，仲即刻表演咗一段Rap，仲加埋啲Beatbox，但我完全冇Feel囉！因為實在同我當時嘅男性朋友水平差太遠，佢直頭流住Rapper嘅血咁，好有天分！可想而知我當時係鍾意音樂才子型，哈哈！」