森美憶首做港姐司儀跟曾志偉偷師：原本以為窒下佳麗就完成工作

森美近日夥拍MIRROR、ERROR成員拍廣告，大讚氛圍開心，更笑言自己對ERROR不陌生：「我以前都做過對搞笑組合叫森美移動，成日都同佢哋講我係前輩！」問到會否想參與其中再組男團，森美說：「如果可以都好！自從《江南Style》之後都冇大叔舞，如果有機會我都可以跳下大叔舞、唱下大叔歌。」

提起曾志偉近日回巢無綫電視（TVB）擔任副總經理一職，森美回憶起第一次做《香港小姐》競選司儀就是跟曾志偉拍檔，又表示從他身上學到很多：「佢係司儀但唔單止做司儀嘅工作，佢喺幕後設計好晒問每一個佳麗嘅問題應該點問，除咗每一條問題到底有冇趣，佢仲幫個佳麗諗埋點答，兼諗埋點樣幫佳麗兜（圓場）。」此舉令森美感悟甚深：「我哋好多時做司儀都以為窒下個佳麗就完成工作，但一條好簡單嘅問題佢都花好多心思、做好多功課，呢啲細心係喺佢身上學到。」所謂見微知著，森美表示：「同佢工作過嘅朋友都知佢好照顧身邊嘅人，無論係台前幕後，從最高層去到掃地阿姐佢都會照顧到。」問到不時主持綜藝的森美有否受影響，他說：「每一個高層都有自己嘅方向；我唔太擔心，冇乜所謂啦，有工作咪盡力做。」