波多野結衣面癱無法眨左眼　李璨琛亦曾中招：食麵飲湯會漏出來

曾在港產片《棟篤特工》亮相嘅日本女優波多野結衣人氣一直高企，最近佢喺Twitter自爆面癱，將所有所有工作暫停，令粉絲們表示相當擔心。波多野結衣於Twitter表示自己面部不適，診斷疑似「顏面神經麻痺」，目前舌頭有麻痹感覺，佢話依家只有右邊面郁到，左眼無法緊閉，令對眼好乾不停流眼淚，而左邊鼻孔亦無法控制鼻水流出。波多野結衣話自己，正接受類固醇治療，亦因此導致免疫力變低要留家休養。

原來中外有不少明星都曾經患上面癱，包括安祖蓮娜祖莉、官恩娜、李璨琛、張達倫、蔡康永等。李璨琛曾經喺接受《香港01》訪問時話：「04年喺電視台做緊歐洲國家盃主持時，突然間個嘴合不上，係食麵飲湯會漏出來嗰種。照鏡發覺左邊臉全部唔識郁，到醫院檢查後，證實患上貝爾氏麻痺症，是濾性病毒入侵中樞神經，從而影響控制面部那條神經線。」

患病不緊要，最緊要是會否康復。「醫生說有人會完全康復，有人好得兩成，好彩的會有7成。心想︰『不是吧！下半世就是這樣面歪？豈不是玩完？』」由於簽了合約，工作還得繼續，左邊面面癱期間，仍奮力去講波。「真的好辛苦，發音都發不到，簡單的眨眼動作又做不來，睡覺要用手蓋住。」

而張達倫入行初期亦曾患上面癱：「我記得喺有日突然瞓醒，塊面痺痺哋、怪怪哋，然後隔咗兩日塊面冇咗力，即刻去睇西醫，佢話我三叉神經入咗細菌感染，真係唔知咩原因。試過非常痛，塊面好似被火燒咁樣，好彩嗰陣啱啱入行，做嘅多數企喺後面，痛到要即劇返屋企瞓喺度，好辛苦，痛到唔識形容，左邊塊面冇咗力，所以係咁流口水，有時飲水，塊面Hold唔到力，一邊飲就一邊喺左邊漏，駛咗幾多錢都計唔到，因為又睇西醫、中醫、針灸，嗰陣西醫就食類固醇，但就攪到成個人好肥、好腫，後尾搵咗萬全堂嘅錢太幫我針灸，就醫好咗，其實而家一有少少事我都搵佢，佢好幫我，佢叫我塊面唔好吹風，冷氣又唔好對住，同埋而家我都有少少大細眼，都有影響㗎，希望愈來愈好啦，因為會限制咗我做戲嘅表情。」