後生仔傾吓偈｜黃夏蕙講初戀：我鍾意啲男仔好勁

年三十晚播出一集嘅《#後生仔傾吓偈》，請嚟黃夏蕙做嘉賓，一班後生仔更喺錄影廠特地整一個迷你香爐，同夏蕙姨一齊上頭炷香。夏蕙姨表示去咗上頭炷香，每年年三十晚嘅下午三點就要去到黃大仙排隊，風雨不改兼無得代排，而由於每年都要有生宵造型上陣，所以佢約早上七點就要起身排隊，對於十二生宵嘅扮相，夏蕙姨就話最愛猴年打扮，因為服飾都係特別訂造。

去得《後生仔》，少不免要講下感情，夏蕙姨表示屋企當年雖然管教十分嚴，但自己性格反叛，不時都會去蒲同拍假拖，咩係拍假拖呢？，夏蕙姨話「去街當拍拖，連手都唔會拖」，至於初戀則發生喺18歲，夏蕙姨仲話「係一見鍾情。」面對一班後生仔，黃夏蕙大讚可愛之餘，仲話如果要揀的話，會揀「狂野港姐」廖慧儀嘅緋聞男友孔德賢（Danny），並講：「唔知點解，佢膚色顯得身體好健康，我鍾意啲男仔好勁、高大。因為自己都係鍾意運動，我以前滑雪、網球都好叻。」

同場加映：黃夏蕙為上頭炷香曾被扯甩假髮　每年12生肖造型成焦點