【致命復活】朱晨麗狂摑郭晉安 出盡力堅打：真係啪啪聲！
最近《致命復活》興起一鋪推理癮，競猜誰是綁架郭晉安的Final Boss，劇中演員個個都三緘其口，只透露：「去到大結局你咪知！」真係等到頸都長。朱晨麗都不例外，對於同樣問題，她都表示：「總之件事就唔止得一個人關事！」真係咁神秘？不過對飾演葉秋的朱晨麗來說，如何演繹得好比起搵終極大佬更高難度！
攝影：符祥定
化妝： Raymond Yip
髮型： Steve Shek @ HAiR
朱晨麗今次飾演女強人，為了更加神似，她特地剪去一把長髮，變得更加硬朗。搞掂外形，就要搞掂內心戲。今次與3屆視帝郭晉安再次合作，朱晨麗仰慕對方之餘，又要由愛生恨，心情極其複雜。回想這一切，朱晨麗憶述當時緊張到安仔都feel，「安仔係我一直好欣賞嘅演員，而且佢係視帝，有一場戲要打佢，我就好緊張。但佢就安慰我：『唔緊要啦，你真係打落嚟啦，借位好流㗎！』結果我就打，真係啪啪聲，仲要拍埋分鏡，打咗好多下，我都替觀眾心痛。」
不過，朱晨麗形容與安仔合作，過程好似他們曾拍過的《末代御醫》的關係一樣。其中談及有一場吻戲，朱晨麗心感安仔會覺得唔好意思，反過來安慰對方，「我就同安仔講，我唔係第一次拍吻戲，你放心錫落嚟啦！結果拍出嚟，大家都覺得好靚。」其後她記起有次與安仔閒聊，「我好坦白同佢講因為工作，要背好多名詞，有經常失眠呢個問題，咁啱佢都有相似嘅經歷，講講下佢開始介紹我用咩床褥會好訓啲，又會同我講邊隻香薰好用，食咩會好瞓。」安仔如此貼心，又無架子，難怪朱晨麗形容兩人有如《末代御醫》裡的珍妃與御醫，「好似幫我把脈咁！」
至今入行5年，對於朱晨麗來說，最想做得愈來愈好的地方，就是廣東話要說得再標準一點：「我唔係土生土長，眼見其他演員講對白講得咁順，真係好羨慕！因為做戲好需要一氣呵成，有少少唔舒服嘅地方，觀眾係會睇到，廣東話都算係我最大嘅敵人，但我想同佢成為朋友。」所以目前為止，朱晨麗仍然苦練廣東話，她笑言沒有捷徑，唯有標好劇本每一個音，事前提早時間問朋友意見，「皆因觀眾係我嘅米飯班主，唔想因為語言問題，聽到覺得刺耳而失去觀眾的支持。」
朱晨麗今次憑《致命復活》而獲得「最佳女配角」提名，問到會否想有獎揸手，她說：「有獎當然開心，但都係平常心，就算拎唔到，都會有好多唔同嘅獎，我會一直向住目標進發。（目標而家好明確？）慢慢嚟啦，做好自己先，但無目標嘅話會好迷失，咁仲點解要留喺度呢？我相信我做嘅一切係值得。」
除此拍戲，朱晨麗最近與友人合資開畫廊，向來喜歡藝術的她，原來此舉是為了慈善，「我哋3個年齡層分別係20、30、40，好多人做生意以賺錢為目標，之後先做慈善，而我哋係以慈善為目標做生意，將賣出去嘅畫嘅錢去幫一啲有需要嘅人，嗰種滿足感真係好大。」醉心藝術的朱晨麗，原來還有一個夢想，就是開芭蕾舞學校，「我一直學芭蕾舞，到過唔同地方去表演，其實有好多回憶，如果真係有機會，想開一間學校，做自己鐘意嘅事。」工作排得密密麻麻的朱晨麗，希望你夢想成真啦！
向來有不少緋聞的朱晨麗，早前又被傳與葉澍堃細仔葉瀚華交往。她聞言後直接地回應：「我同佢係朋友，唔好斷我同佢嘅米路啦！搞到大家如果想追求我或者佢嘅話，因為緋聞都唔夠膽啦！哈哈！」提到現時感情狀況，朱晨麗坦言：「今年好似胡杏兒同楊怡咁，佢哋本身都唔算早結婚，都係有咗事業，但最後都搵到真命天子，好幸福，咁我都唔需要太心急嘅！」說到尾，朱晨麗沒有特定的對象，選擇靜靜地等待合適的對象降臨。