劉佩玥澄清陳瀅無新歡：食餐飯唔代表一齊
撰文：郭敏玲
出版：更新：
劉佩玥（阿Moon）今日出席手袋品牌活動。自TVB宣布台慶頒獎禮提名名單後，阿Moon隨即成為「飛躍進步女藝員獎」大熱，她坦言自己沒想過，「其實好開心，大家覺得我有進步，而且有機會入圍，已經好開心，希望大家繼續提點，之後會繼續畀心機。」阿Moon講到未來除了拍戲，還會上聲樂課，係咪未來仲會出碟做歌手？「有機會都想試下，但點都想打定個底，始終呢方面都想力臻完美，話晒唱歌會唱live，都想學好啲，畀到大家一個交代都好嘛。」
至於網民最近舉行投票選最鐘意組合，分別是「《一屋老友記》劉佩玥與張彥博 VS 《城寨英雄》劉佩玥與伍允龍」，阿Moon聽後表示：「點解冇我係《殭》同關禮傑個pair嘅？」，同香香喺《實習天使》都唔錯呀！」她知道大多年青人都比較喜歡投票嗰兩pair，睇得開心就好。提起香香，就講到最近圈中好事多，阿Moon話：「好戥香香、Grace（王君韾）同雪雪（孫慧雪）開心呀！可能今年腳頭好，我之後都應該會去雪雪個婚禮，我同佢真係好好朋友，都想見證呢個開心時刻。」
而好姊妹陳瀅最近被指有新歡，阿Moon隨即替對方澄清，「都係假㗎！其實邊有咁多男朋友呀，只係食個飯就係一齊，咁都幾忙下。」阿Moon都認識男方William，表示他是陳瀅在加拿大認識的朋友，又稱，「依家大家都會起底，但其實唔關陳瀅事，咁樣會令佢同朋友都有好大壓力。」