【專訪．影片】Miss Hunny爆曾患子宮頸癌 ：「世界變咗黑色！」

平時大癲大肺，愛拍片引網友笑的魔術師Miss Hunny，原來有過一段黑暗期，1年多前她證實患上子宮頸癌，愛玩愛笑的她頓時晴天霹靂，對生命感到迷惘。人生並非像哈利波特般揮一揮魔法棒就可變走的。

不懂何謂「病變」　醫生解釋：即係患癌

Miss Hunny因感到痛楚去看醫生，檢驗後醫生指她「病變」，她搞不清甚麼是「病變」，腦海一片空白，醫生解釋即是癌症她才明白，她形容那天整個世界都彷如變成黑色。「嘭！一聲好似打咗個雷，吓！我會唔會冇頭髮？我好鍾意染髮喎！嗰一日個世界係黑色！」Miss Hunny說收到這個消息當日還要去數碼港接受電台訪問，但因等報告趕不及錄音時間，她告訴電台主持人自己患了癌症，可是該DJ以為她找藉口，竟然取消了她的訪問，當下更令她感到難受。

不過最令她苦惱的不是病，而是如何面對家人，最後決定不告訴媽媽，她說：「我唔敢同佢講，怕佢擔心，怕佢鑽牛角尖，又唔想佢太頻撲，佢話煲湯、煲藥，知我喺邊度拍嘢又會攞飯盒嚟，我唔想咁樣。」她說當時只有5個人知道這件事，包括親密戰友司徒夾帶。

西藥有副作用　轉用中醫療法

醫生開了西藥給她，不過副作用是越來越肥，病情也不見好轉，Miss Hunny唯有靠媽媽：「我媽咪係中醫嚟嘅！佢知道咗之後開咗啲幹細胞藥畀我。」她說媽媽的藥對她來說非常有幫助，加上她保持做運動、多喝水、早睡和健康飲食，幾個月前覆診接獲好消息：「診所打嚟話啲癌細胞冇晒喎！之前照到嘅黑影呀、腫瘤呀都冇晒！好番晒！」

回想患病的時候，身為魔術師的Miss Hunny也有些感嘆：「好多魔術師都有自己嘅問題，自己嘅困難同毛病，世界第一嘅David Copperfield又好邊個都好，都改變唔到一啲事實，都變唔走個瘤！不過我唔會因為咁而痛恨自己嘅身份。」她也很慶幸自己是個魔術師：「魔術師有無限嘅想像力，我諗好起上嚟都可以好好喎！所以唔開心嘅時間其實唔係keep咗好耐。」今日Miss Hunny已健健康康地繼續生活，抗癌或者要靠藥物，但保持心境開朗其實也很重要。