萬千星輝2020｜黎諾懿笑稱冇對手攞硬視帝：大家都知我好戲

「疫境廚神」黎諾懿今日（7/1）現身灣仔出席自家品牌新春慈善賀年糕點釋出會。諾懿表示：「今年都係秉承傳統做咗三款糕點，扣除成本後，將全數撥入受惠機構《九龍樂善堂》嘅膳待飯勞計劃度，只要大家買一盒賀年糕點，就可為一戶基層家庭提供10餐免費膳食，所以覺得好有意義。」

黎諾懿力撐丹爺攞視帝寶座。（陳順禎攝）

提到有份競逐視帝寶座，諾懿笑言：「今年都係我攞，視帝唔係我攞仲有邊個呀！但今年我就唔攞住喇，我就想丹爺（劉丹）攞，因為佢喺《愛回家》度做我老豆都做咗咁多年先畀佢先，大家都知我好戲㗎啦，年年都冇乜對手，咁咪下年再攞！（唔怕王浩信聽到嬲你？）點會嬲我啫，浩信佢攞過喇，唔好咁貪心，畀吓人攞啦！我成日都講，一個大家族一齊分享開開心心。其實浩信佢攞唔攞獎，好多人都覺得佢好戲。」