【無綫大馬頒獎禮】蔡思貝超搶鏡　陳展鵬胡定欣「拍住拖」攞大獎

昨晚舉行的《TVB馬來西亞星光薈萃頒獎典禮2016》圓滿結束，這個頒獎禮向來被譽為台慶前哨戰，所以有份出席的藝員都會盛裝打扮，其中只奪得「最喜愛TVB電視角色」的蔡思貝及唐詩詠，均以超低胸晚裝現身，輕易成為頒獎禮的焦點。

有口皆碑的劇集《城寨英雄》理所當然成為大贏家，「拳佬」陳展鵬及「刁蘭」胡定欣雙雙榮膺視帝及視后之餘，更同奪「最喜愛TVB螢幕情侶」、「最喜愛TVB電視角色」及「最喜愛TVB劇集歌曲」，而《城寨》亦贏得「最喜愛TVB電視劇集」獎項。

今年冧莊做視帝的陳展鵬表示獎項對他有重大意義：「我兩個婆婆都喺呢度出世，所以攞呢個獎係我嘅心願，今年可以再攞，我好驚喜。另外仲要多謝一個人，無論我受幾多挫折，我返到屋企後幾咁唔想返工，佢都一定喺我身邊，多謝媽咪！我呢世還唔到畀你，我諗要留番下一世。」至於去年要與田蕊妮瓜分女主角獎的胡定欣，今年獨霸視后獎座，在台上亦不禁眼濕濕。她說：「我好多謝同事短短呢五年間將我帶到嚟馬來西亞，每一年我都可以出席呢個頒獎典禮，由新人、女配角同上年半隻腳踏住，拎咗半個女主角。我當時同粉絲講，我一年後要憑自己能力再踏上呢個舞台，好多謝大家咁鍾意刁蘭呢個角色。」

至於憑《一屋老友記》人氣反彈的滕麗名，順利成章奪得「最喜愛TVB女配角」。阿滕上台致謝時落淚，更自嘲是「失蹤人口」：「好多謝爹哋、媽咪包容我呢個失蹤人口，同埋老公嘅包容。我一路覺得努力做嘢，唔會在乎有冇獎，但原來攞獎咁澎湃嘅！」

頒獎禮還有另一個感動位，就是奪得飛躍進步男藝員獎的張頴康。入行16年的他提到自己首次出席頒獎禮及奪獎，不禁表現激動，更在台上感謝太太麥雅緻讓他發夢：「我有一個故事要講畀大家聽，我六年前，我想成家立室，但係冇錢，所以放棄做演員，去咗做文員，當時要中港兩邊走。點知有一日發生車禍，我諗呢十年嚟我連主角、甚至配角都未做過，好唔甘心！於是我返屋企同老婆講，我要返無綫！老婆講咗句，發你嘅夢啦，屋企我頂，錢嘅嘢唔使理！多謝老婆，永遠愛你。」