滕麗名拍《一屋老友去旅行》　爆劉江最爛玩：玩越野車玩到手損晒

劇集《一屋老友記》口碑唔錯，於是有個延續，變成旅遊節目《一屋老友去旅行》。歐陽震華、滕麗名、呂慧儀、劉江、羅蘭、盧宛茵、張穎康及張彥博一齊去台灣，玩成18日。今日就在將軍澳舉行記者會，兼且慶祝羅蘭姐82歲生日，非常溫馨。

節目去了墾丁、花蓮及宜蘭三個地方，滕麗名表示今次可以同一班如此熟稔的演員去旅行，就算百忙都抽了9天去台灣開心下。阿滕表示：「拍節目的時候，幾乎每日都笑到七彩。雖然同場又有羅蘭姐、劉老師（劉江），當然會take care佢哋，但佢哋好似大細路咁。」阿滕大爆劉江係眾人之中最「爛玩」，「劉老師咩都話好，我哋就話睇下班後生仔點先啦，但佢都話無問題，去玩越野車，玩到隻手損晒！佢仲係咁多人入面玩得最多日嗰個！」阿滕表示拍攝過程不停轉酒店好攰，但如果日後私底下再一齊去旅行都可以，最想一齊來個短線遊。

講到最「爛玩」的劉江，問到去到台灣點解咁雀躍，他笑說：「困咗係TVB咁耐，一聽到有得去玩，仲唔開心？！」據知他足足玩了18日，玩得如此投入，劉江表示平時其他演員望慣他嚴肅的樣子而已。提到有出浴，張穎康在背後擦背的鏡頭，劉江表示：「都係溫馨場面嚟啫！」但到坐越野車環節，劉江最終都要半裸出現，他說：「本來著咗雨褸，但後來成身濕晒，剝咗衫無咁凍嘛！（有無諗過自己會半裸？怕唔怕羞？）咁又無喎，大家玩得咁開心。」劉江表示如果有機會再拍旅遊節目，都會考慮下，最好再去遠啲