陳安瑩與初戀男友拍拖42年默許「包二奶」：有人煲湯畀佢都唔錯

陳安瑩日前亮相香港開電視《開工大吉77》接受好友苑瓊丹訪問，安瑩笑指苑仔是「大家姐」，因曾在劇集中飾演兩姊妹：「戲行好多前輩都係好錫我，好似鄧碧雲嘅媽媽係我媽咪嘅契娘，所以我叫佢做姨媽，而關德興師傅就係我契爺。我小朋友𠴱陣，梁醒波、何非凡、李寶瑩呢啲前輩睇我唱戲，呢啲係好珍貴嘅回憶，但我都冇咩同人講過。」安瑩就話冇靠人脈，自己考訓練班入行：「當年中五畢業屋企冇嘢做，電視剛播出招聘廣告，阿媽一句質埋嚟『又話去？』，我就同佢鬥氣『去咪去！』，咁就入咗行。我記得第一日上堂，我同考官講『我冇可能覺得自己唔得囉！』」

除了幕前演出，陳安瑩涉獵多個部門工作：「當年我個樣唔識大，所以去做兒童節目，咁有時唔洗拍嘢，我就去公關部做兼職，幫手回信比觀眾。之後我去咗配音組，我仲幫過苑瓊丹配音，嗰次印像好深刻，因為把聲真係沙晒。」多年來飾演配角，未嚐主角滋味，安瑩亦安於現狀，為作品打拼：「因為一個金字塔得一個塔針，要下面啲底層推佢上去，我都有功勞，演員冇分主角定配角，都要演好場戲。」

「爛做」的陳安瑩笑言不是富婆，安於做演員崗位：「雖然我有試過爆騷嘅，但我又唔係做主角，我又冇爭過要做主角，專心投入工作。亞媽話過三十歲之前唔好結婚，呢句嘢入晒腦，依家男友係圈外人，咩名就唔好講啦！我地係初戀，由18歲拍拖到依家，大家都冇晒結婚嘅慾望。依家佢長居內地，有朋友問我怕唔怕佢包二奶，我都諗咗一諗，自己照顧唔到佢，有人煲湯畀佢都唔錯啊？」