東張西望｜落情降聲稱被勒索30萬　七仙羽爆有明星落情降下場淒慘

無綫資訊節目《東張西望》周日（25/10）播出最新一集，其中講到有不少人分手後竟選擇做情降求復合，更聲稱被勒索威脅。

節目中，兩名曾大灑金錢、購買情降服務的男女，稱情降不但無效，更屢屢被師傅要求補錢，否則會公開所有個人資料，包括照片。事主又指，該名降頭師曾出言恐嚇，「會搵律師告你」，有人更聲稱被勒索近20、30萬。有泰國師傅解釋，情降的原理是利用鬼怪擾亂人的腦電波，通常儀式會運用死人屍油、屍膏、肉、椰青和茶等等，求神仙或鬼怪幫手復合。

店鋪負責人澄清事件為同行惡意抹黑

被指招搖撞騙，提供情降服務的店鋪負責人其後主動向《香港01》澄清事件。他表示，《東張西望》所報道的事件是源於同行因妒忌而起的惡意誣衊，「事件起源就係，因為有個人開咗個專頁啦，喺Facebook定喺Instagram都有開專頁，就係專門攻擊我哋店鋪嘅。而呢個專頁就係極大可能係一個行家開嘅。因為佢哋持續攻擊咗我哋一、兩年。咁就會有啲曾經攻擊過我哋嘅客人，覺得效果未如佢哋嘅理想，咁就send曬所有whatsapp嘅對話記錄呀、入數嘅記錄畀佢哋。有啲對話記錄係真嘅，有啲係假嘅。」

負責人稱，該名同行製造假對話記錄、以及斷章取義以抹黑其店鋪。另外他澄清，報道中他指會訴諸法律行動一句，是源於該名客人「走數」、「唔肯畀尾數」；他亦指自己有實體店及商業登記，並非報道所指沒有實體地址。他坦言，法事或佛牌並非百分百有效是眾所周知，然而「有啲客唔講道理」，因為法事不成功便聯同惡意抹黑的同行誣衊他們，亦指自己的店鋪「冇2、30萬嘅客，我懷疑係虛構出嚟」，並指上述指稱「冇證冇據」，「佢哋（東張西望）冇聽到我哋講嘢，凈係聽曬佢哋嗰邊。」

七仙羽：情降冇效係師傅冇料或已過期

到底情降是否真實存在？《香港01》曾訪問七仙羽師傅，她坦言情降是真實存在，「不論任何法科都會有情降，例如道教、泰國、西洋魔法，方法有唔同、用嘅材料唔同，但結果都一樣。西洋魔法就會點蠟燭、用魔法油、燒煙，係指定時間寫心願；而道教就會用稻草人；泰國好多方法，例如養鬼仔、或者用靈嘅屍油。情降通常有期限，通常係三個月至半年，通常情降冇效，係師傅冇料，或者時效已經過咗。」

兩年前曾有藝人求助　下場淒慘

七仙羽又直言，受降者會性格大變、情緒失控、堅持要分手或離婚。她坦言，情降是邪門法術，但並非所有情降都有報應，「如果本身家庭幸福，突然有小三，個大婆搵師傅落情降，令到個老公好迷戀家庭、呢啲就係好嘅情降。如果小三為結婚而拆散人哋家庭，搞到人哋離婚，就會有報應，咁都要講道理㗎嘛！ 」

她透露自己經常碰到情降事件，「兩年前有個唔出名嘅小明星嚟搵我，話結婚唔夠一年個老公堅持要離婚。我問返神仙，原來佢以前都係做人小三，仲搵師傅向個男人落降，拆散人哋家庭。男人要求離婚後，呢個女人就好嬲，但有病、又失業、大咗肚之後仲被人趕出家門，男人一蚊都唔畀佢，想搵其他男人都搵唔到，呢啲咪因果報應。師傅唔會話哂啲後果畀你知，佢唔理你之後啲手尾，都係睇你夠唔夠膽做！」

東張西望｜Party Room梁生原來係「男臣BB」　曾揚言直播食屎走數