憑《疫境廚神》贏得型男廚神美譽　黎諾懿暫無意開餐廳：好困身！

黎諾懿今日（28/9）亮相無綫劇集《C9特工》宣傳造勢活動。提到在疫情下，憑綜藝節目《疫境廚神》教大家煮好餸，贏得網民喜愛，諾懿表示：「其實我從來都冇鋪過自己會煮嘢食，喺5年前做《馬家開飯》嘅時候，我都周圍去食嘢，當時遇到好多好勁嘅師傅，都有請教佢哋。到咗疫情嘅時候，公司就話搞個煮嘢食節目，煮下煮下就5個月，變咗大家覺得我係廚神咁，咁所以我成日都覺得好多嘢都係整定。」

黎諾懿自從贏得廚神美譽之後聲價十倍，被問到會否學李家鼎進軍飲食界開餐館？諾懿直言沒有這個打算，「其實做餐廳好困身，變咗好全職，我想好似兼職咁玩下就Ok，始終演藝係我想要嘅事業，如果我太過花心機係嗰度，肯定會分散咗力量，咁所以暫時唔會搞餐廳，因為我煮唔到咁多，反而可能會搞下啲產品，因為冇咁傷神，偶然煮下嘢食俾啲朋友咪仲好。」