【紅過PPAP】新垣結衣新劇片尾舞紅爆 　人人爭住跟跳

幻想女神新垣結衣每朝早叫你起床、幫你洗衫、打掃、煮飯，由頭到腳照顧到無微不至，日劇《逃避雖可恥但有用》（逃げるは恥だが役に立つ、港譯《僱傭妻子》）滿足晒咁多個願望，因為結衣BB今次飾演專屬女傭，不單照顧男主角（及觀眾幻想）的起居飲食，更爆的是片尾跳舞賣萌，搞到班粉絲高呼「叔叔不行鳥」，仲掀起一股萌舞熱潮，仲《PPAP》？Out啦！

故事講述結衣BB考到牌做臨床心理醫生，但竟然搵唔到工，輾轉之下經阿爸介紹幫個IT毒男中坑星野源打工，兩人同一屋簷下互生好感，女神仲主動提出由女傭升呢做假想老婆，嘩！公平咩？聽落似每個結衣BB忠實擁躉的FF故事，其實是改編自同名少女漫畫，TBS電視台拍成日劇，於秋季檔「火10」（逢星期二晚上10時）播放，10月開播至今收視穩步上揚，上星期錄得13％，成績相當不錯，TVB已買下版權並於本月18日在收費日劇台開始播放。

結衣BB跳萌舞帶挈收視上升，但不要忽略男主角星野源的助攻，觀眾未必好熟悉這位四眼仔，現年35歲的他夾Band出身，2003年開始演日劇及電影，9成9時間都是配角或客串，挨到30歲先正式出碟，豈料未夠兩年卻患上罕見腦病蜘蛛膜下腔出血（Subarachnoid hemorrhage, SAH）而要停工。幸好病癒後好運隨之而來，除首次主演日劇，去年尾推出的第4張專輯更登上Oricon大碟榜冠軍，首次獲邀參加紅白歌唱大賽。結衣BB跳舞的背景歌曲，正是星野源新歌《戀》，輕快節奏配合萌爆舞步，可謂如虎添翼。

其實結衣BB以往拍廣告都會跳番幾Part舞，10年前的百力滋廣告比《僱傭妻子》的萌舞跳得更奔放，當年只有18歲的她真係好Pure好True。