【香港小姐2020】冠軍謝嘉怡選完最想食碗叉燒飯：個肚打晒鼓！

年度選美盛事《2020香港小姐競選決賽》昨晚（30/8）圓滿落幕，謝嘉怡（Lisa）眾望所歸勇奪冠軍，賽後Lisa接受《香港01》訪問時難掩心情興奮：「當宣布我攞獎嘅時候，我唔知做乜，好似發緊夢想行落台，都唔知行去邊。其實我真係冇諗過自己會贏，因為自己講廣東話好差。」

被問到會否留在香港發展，Lisa展現出好大的誠意，她說：「我想學講廣東話，又想學寫中文，所以我想遲啲喺香港發展。（有冇男朋友？）而家冇拍拖，都成四年冇男朋友。（選完最想食乜？）好想食叉燒飯，好希望Daddy一陣買定啲嘢返嚟畀我食，因為而家好肚餓，個肚打晒鼓。」