李佳芯被指搬風水屋轉運　即獲無綫解禁埋班拍劇：我租屋全憑感覺

李佳芯(Ali)今日（5/8）現身電視城出席《殺手》劇集宣傳造勢活動。提到劇集今個星期五將會大結局，Ali大感不捨得：「其實呢套劇拍嘅時候都係兩年前，好多劇情上同內容上都唔記得，當睇返嘅時候，有好多感受同回憶都返晒嚟。」

李佳芯早前疑因網上言論惹禍，而遭到無綫「雪藏」，期間完成了她首本散文集《心之所往》。而劇集《殺手》播出至今，Ali演出亦大獲好評，備受視迷喜愛，無綫試水溫成功，亦特別為她安排參演外判劇集《智能愛（AI)人》，而Ali在劇中會飾演Al機械人，同陸永和馮盈盈發生三角戀，事業重生有指Ali獲高人指點，搬入西貢豪宅風水屋求轉運。

Ali笑言：「其實我不嬲都好好運，我係一個幸運嘅人嚟嘅，但今年更加開心就係有自己嘅一本散文作品面世，而下個月亦收到通知入劇。話我搬屋轉運緊唔係啦，搬屋嗰度其實一早已經搬咗，如果係轉運就一早就好咗啦！如果係好運，之前就唔會有咁多負面新聞啦！其實我搬屋係冇刻意去搵人去睇風水，我租屋全憑感覺好就搬入去住。」