調教你男友｜Jeffrey公開童年照驚現三層肉　11年後輕鬆變男神

現年22歲的Jeffrey（魏浚笙）近日因出演ViuTV真人騷《調教你男友》而成為女生新寵，超乎現實的帥氣外型更令不少女觀眾「心心眼」，令網民都很好奇Jeffrey是不是由細靚仔到大。他昨晚（22日）公開多張11歲時的肥仔相，證明自己小時候只是肥仔一名，正所謂肥仔都是潛力股，果然是永恆的真理！

他在Instagram上載幾張童年對比照，只見擁有模特兒身形的Jeffrey原來11年前是個胖胖的小朋友，不但臉蛋圓碌碌，其中一張只穿着泳褲坐在泳池邊的照片更明顯見到他肚子驚現三層肥肉！不過，Jeffrey去到中學時就已經減肥成功，五官和輪廓都變很立體，絕對有資格做校草。

Jeffrey發文叫大家要珍惜身邊的肥仔，因為他們隨時嚇你一跳搖身一變成為男神：「只能說每個胖子都是潛力股啊，期許自己能成為讓父母驕傲的小孩，但有時候當個胖子幸福多了，你懂嗎？」

Jeffrey接受《香港01》訪問時表示，自己小時候比較貪吃，所有甜食、零食及煎炸油膩的垃圾食物無一不愛，因此成為一個大肥仔，直到中學時突然間長高後開始逐漸搣甩肥仔形象：「中間都有打泰拳去減肥，但識到女朋友之後，因為幸福肥體重又暴升到83至85kg左右， 直至有一排抵抗力低突然起「風癩」，但同時又有工作要焗住頂硬上連續拍幾日通宵輕咗幾公斤，見到自己上鏡靚咗，就真係開始下定決心減肥！」

他笑言自己在19、20歲時開始了為期一年的減肥大計，177cm高的他由80多kg跌至64kg：「首先我半年冇食晚餐，奉行16/8 飲食法（即每天斷食16小時，並只在剩下的8小時內進食），只食番薯、西柚等低卡路里又高纖維的食物，再同時努力做gym ，尤其負重運動對減肥修身好有成效！咁樣持續咗一年左右，減咗大約30幾磅！」

不過，Jeffrey不太建議大家用他的方法來減肥，雖然有做運動但因為節食的緣故令體重跌得太快，身體很容易會難以負荷：「嗰排因為身體太虛弱日日流鼻血，大概用咗一、兩個月去補番啲營養，身體先慢慢適應番。」

減肥成功後，Jeffrey亦有繼續控制自己的飲食，防止體重回彈：「我會飲齋啡，真係好幫到手，可以消腫同增加血液環，我亦會盡量少食濃味食物，只有唔使開工嘅日子，先會食多少少唔健康的食物。至於運動就一直都有keep住有做，有勤力做gym同長跑，我而家體重維持喺68kg左右，冇反彈！」

點擊觀看更多Jeffrey的帥氣照片：