【異搜店】何廣沛擁特異功能 　少對白考演技：表情要精準好難

何廣沛（Matthew）今日（29/6）出席在電視城舉行的無綫新劇《異搜店》造型記者會。Matthew透露在劇中角色擁有特異功能，能透過雙手觸摸任何物件，感應得到物件背後曾經發生過的事，劇情相當引人入勝，「坦白講呢套劇係有啲靈異嘅元素，自己本人平時係驚呢樣嘢，都唔敢入戲院睇鬼戲，因為自己係細膽，我睇分場嘅時候我係好驚，但越睇就好想追落去，因為覺得個故事好吸引。」

講起今次角色，Matthew笑言少對白講：「可能對於我哋日拍夜拍嘅演員嚟講，記對白少啲係好事，但相反就好考演技，因為一個微表情，要好精準話到俾觀眾知係好難，並唔容易，監製都成日提我唔好做嘅時候咁木獨就算，冇對白都要交戲，所以自己都要捉緊少少，費事全部都係人嘅鏡頭，而冇我鏡頭，係因為我冇交到戲所致。」