洛兒改用本名「樂宜」　原來獲高人指點轉運催挑花：想要多啲

曾擔任過無綫《美女廚房》美女學徒及ViuTV綜藝節目《辣伙頭》「DJ女神」樂宜，今日（26/6）以嘉賓身份再次為ViuTV全新節目《索女人妻ichi烹》站台支持出席宣傳造勢活動。樂宜講起不再用藝名洛兒，原來背後有段古，「因為之前上過一個命相節目，大師就話我洛兒個名好差，如果有十分滿分，我就係負分，反而我本身個名寫法就會好啲會旺返自己。」

（未改名前有咩唔好？）樂宜直言：「嗰陣拍Tvb美女廚房，一改完嗰個名之後，就同男朋友鬧交，到一至二個月之後就同男友分咗手。（宜家用返本名咪即刻復合囉？）咁又冇，啲過去咗嘅嘢就唔好提啦！不過用返本名之後，係多咗嘢做，工作都好順利，而且又有異性追求，我希望係想要多啲啦！因為可以揀，哈哈！」