趙永洪變大台專用賤男 當街被笑茄喱啡仍堅持：有力都會做落去！
無綫熱播的劇集《巨輪II》，「獸父」吳岱融固然成為觀眾茶餘飯後話題，但衰衰格格的賤男趙永洪，角色不算是大奸大惡，卻往往惹得觀眾邊看邊鬧，對一個演員來說，無疑相當成功，但演活賤男角色，卻反而要付出被定型的代價，在兩輯的《巨輪》、《鬼同你OT》，甚至是拍攝中的《降魔的》，趙永洪的角色「Seven」，雖然不至於作姦犯科，偏偏也是貪玩爛嫖，無厘正經。
反而趙永洪看得開：「已經算係好人嚟啦。」無綫的潛規則是你演得愈好，演得愈似，監製下次開劇就會再次給「機會」該位演員，所以李天翔是「御用強姦犯」、石天欣則是「被姦成名」，至於趙永洪就是賤男代表，捨他其誰。其實趙永洪只是用心演好他被分派的角色，由1999年入讀藝員訓練班開始，他就是抱着這個信念，數數手指已經是第17個年頭，「公司係會不停俾你做認為你做得好嗰樣嘢，做藝人無辦法，都係等一個機會，平常心囉。」
真的沒有機會嗎？在2009年的台慶頒獎禮，趙永洪憑處境劇《畢打自己人》獲得飛躍進步男藝員最後五強，但獲得頒獎禮入場券跟攞獎卻是兩碼子事。說起往事，趙永洪哈哈了兩聲，盡量平靜心情表示：「當時攞唔到獎，係有少少失望，繼續等機會囉。有時拍出來自己覺得好，出街未必真係好，到覺得出街時唔錯，觀眾又未必鍾意，角色受歡迎好多時要講天時、地利、人和，而且嗰年係排骨仔(敖嘉年)贏咗，觀眾始終覺得drama係好啲。」
趙永洪由《同事三分親》開始嶄露頭角，其後有《畢打自己人》、《天天天晴》、《誰家灶頭無煙火》及《愛．回家》，全部也是處境劇，趙永洪輸給當時孭着《碧血鹽梟》及《巾幗梟雄》兩齣劇集的敖嘉年，可謂非戰之罪。趙永洪表示：「拍處境劇都係好事，日拍夜拍咪多咗練習機會囉，但唔好嘅係無時間接拍其他劇，依家再入番劇組，當重新開始過。」
未入行前，趙永洪看着電視跟着演，覺得不是什麼難事，甚至自覺演得不錯，入行後才知道演藝路相當難行，尤其是還在路人甲的階段。趙永洪表示：「當時人工好低，同熟朋友食飯，佢哋知我環境，會主動埋單。我唔敢同唔熟嘅人食飯，自己知自己事啦，用「不留隔夜錢」形容我就最貼切，不過嗰段時間反而最有火，好有熱誠。」
其後趙永洪說起一件難忘經歷，「應該係拍《同事三分親》之前嘅事啦，有日搭緊地鐵，有個7、8歲嘅小朋友認得我，講咗句「明星喎」，正當我準備微笑點頭嘅時候，佢身邊嘅哥哥大大聲話『明乜嘢星吖？茄喱啡嚟之嘛。』當時我成塊面感到好熱，到咗下一站我即刻落車。」趙永洪沒有怪責對方的無禮，而他能繼續堅持下去，只得一個原因「好簡單，真係鍾意演戲」。
趙永洪說會演到80歲，「一日仲有力都會做落去」，但沒放棄不等於沒有壓力，而他身邊的親戚朋友又會覺得「搵得雞碎咁多，做嚟仲乜？」，更令趙永洪感到迷惘是「明明自己能力做到，又好努力，點解無機會做其他角色？呢行嘅唔穩定，搵錢又唔多，我自己都會好矛盾。」有一段時間，趙永洪自言「個人好躁，好易發脾氣，知道自己有啲唔妥。」其後他去了看心理輔導，情緒才得以平伏，「始終旁觀者清，輔導又幫到，而且我都諗通咗，一係堅持，一係放棄，我選擇繼續留低。」趙永洪現時最想拍攝喜劇，更乘機宣傳《翻生武林》，他表示：「角色雖然都係會「入魔」，但起碼係「笑底」，算係做到想做嘅嘢啦，我都好期待。」