【十八年後的終極告白】譚俊彥每日喊住開工：當時有少少抑鬱症

譚俊彥（Shaun）今日（9/4）現身將軍澳出席無綫新劇《十八年後的終極告白》宣傳造勢活動。提起劇集就快面世，阿Shaun坦言有情緒病：「其實我拍呢套劇嘅時候都有少少抑鬱症，因為我記得拍一個禮拜戲，每日都要喊住咁去拍，做演員唔係你話抽離個角色咁容易，其實呢種劇種，對演員嚟講都真係幾辛苦。」

16年加入無綫後一劇接一劇，變成多產藝人，繼《法證先鋒IV》大結局之後，視迷又可以在4月20日晚首播劇集《十八年》再次見到阿Shaun神勇演出。被問到會否劇接劇播出，會否令觀眾生厭？阿Shaun直言：「其實如果睇返以前我拍過嘅《天命》及《特技人》，雖然都係譚俊彥，但攞張劇照睇，完全係兩個人嚟㗎，大家睇完《法證》，到而家睇我呢個樣，都係兩個人嚟㗎，我入行咁多年，希望我唔係譚俊彥，要對得起個角色，我會喺每一個角色入面創造一個人物出嚟。」