羅志祥周揚青傳分手　網友揭二人社交網站個半月未有互動

現年40歲嘅羅志祥，同內地網紅女友周揚青眨下眼拍拖多年，小豬嘅粉絲亦由反感變成支持，仲希望偶像快啲成婚。不過有網友發現一向愛公開發閃嘅佢地，近個半月都無喺社交網互動，惹來分手揣測。

之前小豬同周揚青不時喺社交網打情罵俏，又互相著對方潮牌服飾幫手宣傳，去年聖誕把臂共遊主題樂園，著埋情侶裝放閃。不過有網友發現，今年1月21日後，二人無再LIKE對方嘅帖文，而且周揚青1月22日後無再發文，直至3月先再更新IG。

目前二人仲有互相追蹤IG，但不論係微博、抖音等，近2個月都無PO出放閃帖文，甚至就連2月14日情人節、兩人紀念日都無放閃，因此被揣測「2人已分手」。羅志祥經理人公司回應傳媒查詢時，只表示藝人私事不回應。