【武漢肺炎】張馨予網購又墮騙局：買消毒液結果收到是兩瓶空瓶子

武漢肺炎下所有防疫產品都被一掃而空，只要喺網上見到有人放售，秒回「兩盒Thanks」畀錢買個希望，但唔少騙徒利用大眾呢個心態大肆歛財。內地女星張馨予呢日亦透露自己誤墮騙網：「買消毒液結果收到快遞是兩瓶空瓶子。」

中國地大物博，市民買嘢好多時靠網購，張馨予呢日就喺微博分享自己網購防疫產品被騙：「買消毒液結果收到快遞是兩瓶空瓶子，然後想找店家發現店鋪不見了。」佢喺留言處貼出圖片，寫住「你要找的店舖可能已經搬走了」，感到相當無奈。

被騙感覺當然唔好受，不過張馨予除咗嬲，亦好冷靜分析話：「可是如果是騙錢他們完全可以不郵寄，直接店鋪消失，為何要寄空瓶來？」令網友都相當感興趣，同佢分析呢單網騙事件：「可能是快遞員用掉了」、「可能酒精揮發了」、「人家是不是本來就是賣瓶子的？寫著可分裝消毒液？」