鄭秀文開騷前喉嚨發炎　老牛聲預告：把聲冇一半　

樂壇天后鄭秀文(Sammi)的紅館演唱會《鄭秀文Touch Mi 2世界巡迴演唱會2016香港站》，在明天(16日)正式開騷，令不少粉絲萬分期待。

不過Sammi雖然想為樂迷帶來Good騷，但全情投入練歌排舞，未知是否操勞過度，Sammi身體竟然吃不消，熬出病來，在開騷前竟然喉嚨發炎，Sammi昨日已經在Facebook專頁拍片講述身體狀況，還說「咁呢就咳啦，喉嚨發炎啦，聲都好似冇咗一半，我一定會加油。」片中Sammi成把聲「沙晒」，冇氣冇力，情況相當令人擔憂。

今日Sammi再次拍片透露病情，比起昨天，精神尚算不俗，她說「把聲呢我覺得又好過噚日，咳又少咗啦，明日正式開騷啦，無論點我都會加油，加油。有幾多做幾多。」Sammi硬撐着開騷，又積極為自己打氣，粉絲看到也戥她難受，紛紛留言鼓勵Sammi，「無論把聲變成點，都會支持妳」、「做唔到預期唔緊要，會俾100分掌聲」、「要快點好番呀，有聲冇聲都會很high」。

除此之外，Sammi亦提醒好友及粉絲，她雖然很鍾意花，但最近她鼻敏感很厲害，所以在演唱會期間，大家不用送花牌及花籃給她，若果已經訂了花，她亦會安排地方擺放。Sammi表示雖然現已食藥中，希望開騷前能夠痊癒，還叫大家幫她祈禱。其實粉絲雖然等睇Sammi個唱等到頸都長，但始終身體才最緊要，Sammi放心養病啦，大家會支持妳的。