【武漢肺炎】楊秀惠購入透光口罩　李施嬅不禁問：邊類手術會用？

武漢肺炎疫情持續，全城瘋搶口罩，只要寫住「口罩」兩字大家就爭住購買，已經有網購口罩騙案超過千人受騙。除咗收錢失蹤無貨，就算有貨都可能質量成疑，楊秀惠呢日就喺IG表示中伏，佢接受《香港01》訪問時表示：「朋友幫手喺網上搵代購買，$200一盒﹗」

楊秀惠於IG上載幾張相片，留言話：「買到薄過紙的口罩，完全透光，大家買口罩時要留意。」佢接受《香港01》訪問時表示：「朋友幫手喺網上搵代購買，$200一盒（50個），我買咗2盒即400蚊﹗表明係三層嘅Surgical mask，到咗之後打開嚟睇，發現根本只得一層﹗」

見到楊秀惠拎住嘅口罩即使重疊都依然可以透光，另一張相放口罩喺盒面，盒上「FACE MASK」字樣清晰可見，難怪有網友笑言係：「好性感嘅口罩。」李施嬅都留言問：「The box says Surgical ???? wonder what type of surgery.（盒上寫外科用？想知是那類手術會用。）」