代蓮曦丹美疑胃抽筋入院：似有把鉸剪剪緊啲肉嘅感覺

代蓮曦丹美轉型做潮牌。（IG：@daisy_dai）

常言道小病是福，不過大時大節病住喺醫院過，感覺真係好悽涼。代蓮曦丹美（Daisy）離開TVB後機會不斷，致力發展個人潮牌，可能因為工作太忙搞到新一年年頭就要入院：「似有把鉸剪剪緊啲肉嘅感覺。」

代蓮曦丹美有繼續幕前工作，日前Viu TV新劇《黑市》播出她參與演出單元《不義肢》。（影片截圖）

Daisy近期除咗忙生意，亦要搞網劇及籌備下月往法國出席巴黎時裝周，豈料就忙出個病來，胃痛不適，仲痛到標晒冷汗，搞到新年流流入醫院：「嗰日係胃痛到好犀利，本身諗住食胃藥休息吓，但愈嚟愈嚴重，好似有把鉸剪剪緊啲肉嘅感覺，好痛苦，跟住休息咗一晚之後，第二朝都係唔得啦，都係要入醫院住，睇醫生嘅結果係胃抽筋。」

可能忙得滯令佢疑似胃抽筋入院。（受訪者提供）

其實Daisy向來腸胃麻麻，撞正近期天氣忽冷忽熱，睡眠不足兼飲食不規律，搞到鐵人都瞓低，她說：「好彩今次冇咩事，不過入院時都好驚，因為怕耽誤工作，好彩成功出到醫院趕得切去到澳門做嘢。」

新年流流要入院真係好慘。（受訪者提供）